某天一輛貨車意外地衝上行人路，將兩個三十多歲的人即場撞死，轉眼間兩人的靈魂飛出肉體，飄到奈何橋。

A（驚恐萬分）：點解我在這裏？前面點解有條橋嘅？

Z（鎮定地）：我們兩人應該俾貨車撞死了。

A：我唔可以死呀！我連續幾個星期抽大圍新盤，幾次都抽唔到，如果今次俾我抽中，但我突然死咗，點算呀？可唔可以讓我的鬼魂飛上陽間一陣，揀咗樓後再死過呀？

Z：香港樓市肯定爆煲，你呢家買樓，遲早都會死啦，到時重慘過俾貨車撞！

A：爆你過頭！每年都有人話爆煲，但邊有跌過？

Z：大圍新盤兩房單位，起碼都要 900 萬，我大學畢業十年，每月人工只有一萬多，最近重要凍薪；而我身邊認識的人，全部都係咁窮，要不吃不喝 50 年，才買得起啊！所以我肯定，全部成交都係假，傻嘅才會現在買樓！

A：我身邊的人，包括我自己，每月都搵五六萬元，甚至十幾萬都有；或者父母有樓，畀幾百萬仔女再買一層。

Z：搵五六萬，吹牛呀？回歸後全香港都冇人工加，廿年前大學畢業搵一萬多，今日又係一萬多；如果在香港買樓，每月起碼搵三萬元才供得起，有幾多年輕人搵到呀？跟我同齡的人，以及網上的朋友，一個都冇！

A：網上社交媒體將同溫層的人放在一起，所以要看稅局年報，廿年前年收入超過 40 萬元的人數有 25 萬，十年前是 40 萬人，現在是 83 萬人！這些人要買樓，絕對有能力。

Z：冇可能，我一個都唔識！就算係真嘅，目前失業率升到 6.4%，很多人失業後被迫賣樓，樓價肯定會跌。

A：失業主要是中低收入，大部分都冇樓，金融業的失業率只有 2.8%。

Z：我身邊朋友都計劃移民，寧願到外國洗碗，到時香港人走晒，樓價唔跌就奇！

A：計劃之嘛，走咗未？佢哋都冇樓，點影響樓價？我也想過移民，但香港每月搵開五六萬元，移民後可能兩三萬都搵唔到，點走啊？

Z：唔走在香港邊有希望，職場上面塞死晒，點搏？有希望就同你拼搏，無希望拼條毛咩。

A：在香港做唔掂，可以聽政府的話，到大灣區發展。

Z：叫年輕人番大灣區，係咪黐線o架！你講到大陸識飛都得啦，人工每月得六千，點做呀？

A：我識得很多朋友，在大灣區搵十幾萬一個月！

Z：吹牛！我一個都睇唔到！正當他們爭論之際，轉眼到了奈何橋的排隊位，分別是「老竇有樓」及「老竇冇樓」兩條隊，幾千個鬼魂正在打架搶位。旁邊有位亞婆拿着兩碗湯，對他們說：快些飲咗孟婆湯，走過奈何橋投胎啦！

A：碗湯好臭，可唔可以唔飲湯，飲紅酒？

孟婆：好啦，見你咁靚仔，畀杯 82 拉菲你飲，飲完增強戰鬥力，贏在投胎前。 Z：點解佢有得飲紅酒，我要飲湯，好唔公平！

孟婆：唔公平？你活了三十幾年，乜仲未習慣咩？