如果要選今年港股的一個傳奇，美團（ 3690.HK ）肯定榜上有名。相信有不少老一輩的投資者都會質疑：佢只係送外賣的外賣仔啊，點解可以變出萬幾億市值，超過四大發展商長實、新鴻基、恆基、新世界市值總和的一倍？唔係一間，是四間市值加起來再乘二，有冇搞錯？

在新經濟股的世界，如果成功過到兩關，包括（1）開始時蝕住錢來做，先拿 Market Share；（2）成為市場壟斷者後，撳住客戶及供應商來打，大幅提升 Profit Margin，股價就升到幾癲都唔覺得癲。近期一個成功案例是 HKTV（ 1137.HK ），一年前毛利率及佣金率為 21.2%，運送、推廣及營運等開支 35.6%，即係賣出 100 元的貨品，就要蝕本 14.4 元，賣得越多蝕得越多！但自從肺炎之後，HKTV Mall 成功撳住客戶及供應商，推高貨品銷售價格，有些貨品甚至比超市更貴，訂單要 800 元以上才免費送貨，商戶星期六需執貨出貨，公眾假期不準放假……雖然引來不滿及微言，但幫襯已經成為習慣，鬧完後都係繼續幫襯，客戶 Bargaining Power 變得越來越少，公司的牙力就越來越大，股價也越升越有。

在新經濟的世界中，能夠過到第一關搶到 Market Share 的公司，一百間裏面可能只有十間，而進一步撳住客戶提升 Profit Margin 就只有一間，絕對是「一將功成萬骨枯」。以網購的業務為例，當年蘋果速銷 adMart 創立年半後關門大吉，蝕十億元但連第一關都做唔到；共享單車成功過了第一關，但沒辦法提升盈利能力，結果是多做多蝕，大量倒閉收場。

所以美團是否值得購買，並不是看今天的財務報表，而是要賭一鋪能否成功過到兩關，將來撳住供應商及客戶來提升 Profit Margin，如果成功就算 300 元股價仍算便宜，否則跌到 10 元都未必抵買。截至今年六月底止第二季業績，美團營業額 247.2 億元按年升 8.9%，期內盈利 22.1 億元按年升 151.8%，每股盈利 0.38 元。如果單憑盈利數字，100 元的股價都已經畀多了！但重點是點解營業額升 8.9%，但盈利升 151.8%呢？主要是銷售及營銷開支，只輕微從 41.5 億變成 41.7 億元，佔收入百分比由 18.3% 同比下降至 16.9%，外賣經營利潤率由  5.9% 同比增長至 8.6%。如果這個趨勢可以持續，公司前景就靚仔得多，有機會過到第二關，將來的 Profit Margin 可以大幅提升。

我經常都對初學炒股的人說：「根據今天情況分析後作出買入，這是投資；如果對未來的一些事情作出預測然後買入，這就是投機」。當然投資及或投機較好，是絕對不能比較，投機回報率也通常較高，但我們在買入股票之前，必須清楚自己的定位，通常我會將七成資金放在投資，三成放在投機。因為根據多年的經驗，我在 100 次的預測中，起碼有 40 次錯誤，所以必須做好資金分配，否則可能一鋪清袋。今天看美團的前景是不錯的，但五年之後呢？可能有機會成功壟斷市場，也可能冇人再用，邊個會知？例如新浪微博曾經紅極一時，但今天還有多少人使用？在微博當紅的時候，誰會估到今天的使用率？